महिला तथा बालबालिका कार्यालय मोरङको जानकारी

आ.ब. २०४१÷०४२ मा मोरङ जिल्लाको साविक बयरबन गा.वि.स.मा महिला विकास शाखाको रुपमा यो कार्यालयको स्थापना गरिएको हो । महिला विकास कार्यक्रम आ.व. २०३९÷४० मा सुरु भएपछि महिला सशक्तिकरणको सपना साकार गर्न ग्रामीण क्षेत्रलाई मध्यनजर गरी बयरबनमा यस कार्यालय खोलिएको पाइन्छ । वि.सं २०६०÷१२÷२६ गतेका दिन मोरङ जिल्लाको सदरमुकाम बिराटनगरमा महिला विकास कार्यालयको स्थानान्तरण गरियो । महिलाको मात्र सशक्तिकरण र विकासमा सीमिति महिला विकास शाखाले अहिले आएर दायरा फराकिलो बनाएको छ ।

बालबालिका, जेष्ठ नागरिक र अपाङ्गताको क्षेत्रमा समेत काम शुरु गरे सँगै महिला विकास शाखाबाट यो कार्यालय महिला तथा बालबालिका कार्यालयमा रुपान्तरण हुन पुगेको छ । बिराटनगरको व्यस्त बजार देबकोटा चौक वडा नं १० मा भाडामा रहेको यो कार्यालय २०६८ साल फागुन २६ गते विराटनगर ४ स्थित आयल निगम भन्दा केही उत्तर पूर्व औषधी व्यवस्था विभागको कार्यालय नजिकै आफ्नै भवनमा सारिएको छ । यस कार्यालयको कूल दरबन्दी सङ्ख्या १ जना प्रमुख महिला विकास अधिकृत, १ जना बाल संरक्षण अधिकृत, १ जना महिला विकास अधिकृत, १ जना लेखापाल, ४ जना महिला विकास निरीक्षक, १३ जना सहायक महिला विकास निरीक्षक, २ जना कार्यालय सहयोगी र १ जना सवारी चालक सहित जम्मा २४ जनाको रहेको छ ।